Një studim i porositur nga kompania më e madhe e sigurimeve në Austri dhe një nga më të mëdhatë në Evropë, Vienna Insurance Group (VIG) ka zbuluar se të rinjtë në moshën 18-29 vjeç janë më të ndërgjegjshëm për rreziqet sesa personat e moshës 30-65 vjeç. Por ndërkohë, të dyja kategoritë e moshave, për arsye të ndryshme, nuk veprojnë për të kufizuar dëmin e mundshëm financiar nga rreziqet, si edhe kanë shumë pak njohuri financiare.

Studimi u krye nga “Gallup International” në nëntë vende në vitin 2023 (Austria, Bullgaria, Kroacia, Republika Çeke, Hungaria, Polonia, Rumania, Serbia dhe Sllovakia), me rreth 9000 pjesëmarrës të moshës 18-65 (përfshirë 2,081 të moshës 18-29 vjeç).

Rreziqet e mëposhtme janë përdorur për vlerësimin e njohurive mbi rrezikun: sëmundjet dhe aksidentet me pasoja të rënda, paaftësia në punë, dëmtimi i pronës së banimit, aksidentet e vetëshkaktuara dhe krimi kibernetik. Rezultate e grupmoshës dhe rezultatet për grupmosha 18-29 vjeç janë analizuar veçmas.

Rezultatet e studimit treguan se të rinjtë duan të jetojnë dhe të mos shpenzojnë kohë për të menduar për rreziqet. 80% e të anketuarve nuk ishin ose ishin shumë pak të vetëdijshëm për rreziqet, objekt i studimit, ndërsa vetëm 61% ishin dakord me deklaratën “Unë jam i kujdesshëm dhe përpiqem të mbrohem nga rreziqet”.

Të rinjtë dhe të rriturit e rinj janë veçanërisht grup vulnerabël kur bëhet fjalë për rreziqet e paraqitura nga bota moderne. “Studimi ka zbuluar se të rinjtë preken në një shkallë shumë më të madhe rreziku sesa të moshuarit. Ata e konsiderojnë veten shumë më pak të aftë për t’u përballur me rreziqet kur ato lindin. Kjo pasiguri mund të çojë në vendimmarrje impulsive dhe joefikase që mund të ketë një ndikim negativ në gjendjen e tyre financiare aktuale dhe të ardhshme”, shpjegon Hartwig Löger, CEO i Vienna Insurance Group.

Të rinjtë përballen me sfida të veçanta

Grupmosha 18-29 vjeç ka një gamë të gjerë fushash të tjera problematike për të luftuar përveç faktorit të vetëbesimit. Kjo është e qartë edhe nga rezultatet e studimit. Edhe pse 74% e të anketuarve në këtë grupmoshë thanë se ishin kryesisht të lumtur, ata kishin më shumë gjasa se të anketuarit më të vjetër të raportonin ankth, mungesën e vetëbesimit dhe mendimet mbytëse. “Edhe anketat e përgjithshme konfirmojnë se të rinjve u duken situatat e tyre jetësore shumë sfiduese në tërësi. Pritshmëritë e tyre janë të ndrydhura dhe dëshira e tyre për mbështetje dhe siguri është rritur. Sipas mendimit tim, çështjet aktuale si ndryshimi i klimës, rënia ekonomike dhe lëvizjet e reformave socio-politike nënkuptojnë se brezi i ri përballet me sfida të veçanta kur bëhet fjalë për aftësinë për të marrë vendime të mirëinformuara që marrin parasysh rreziqet e mundshme,” shprehet më tej CEO i VIG.

Pritjet e shtrembëruara për sigurinë

Të rinjtë do të përfitonin nga njohuria e zgjeruar për rreziqet, sepse shumica e të anketuarve sipas grupmoshës presin që shteti do të paguajë ose duhet të paguajë faturat e rreziqeve që lindin. Përqindja e të rinjve që mbështeten në ndihmën shtetërore në rast humbjeje ose dëmtimi është më e lartë në Austri me 65%, e ndjekur nga Sllovakia me 62%. “Sa më të madhe pasojat e pritshme, aq më e lartë pritshmëria se shteti do të ndërhyjë. Ky supozim thjesht nuk përkon me realitetin. Në Austri, shteti nuk jep fare kontribut për kostot e pasojave të përhershme të aksidenteve. Dhe kushdo që e gjen veten të paaftë për të punuar në moshë të re, merr vetëm përfitime shtetërore të kufizuara, për shkak të periudhave të reduktuara të kontributeve, – këta janë vetëm dy shembuj”, thotë Hartwig Löger për pritshmëritë e shtrembëruara që të rinjtë kanë për sigurinë.

Mungesa e njohurive nuk ka lidhje me moshën

58% e grupmoshës së anketuar shprehën interes për të marrë këshilla për marrjen e masave paraprake të nevojshme në jetë. Pra, çështja qëndron më shumë se atyre u mungon njohuria për t’u përgatitur për të ardhmen. Kjo lidhet me mungesën e njohurive financiare të popullsisë në tërësi. Rezultatet e studimit treguan se 80% e 18-29-vjeçarëve konsiderojnë se kanë pak ose disi njohuri financiare, ndërsa 70% e grupmoshës 30-65 vjeç gjithashtu raportuan njohuri të pakta ose mesatare financiare. Pra, mungesa nuk ka lidhje me moshën, por me edukimin. Për këtë arsye, njohuritë financiare dhe rreziqet duhet të jenë pjesë e kurrikulës bazë të institucioneve arsimore. “Shpërndarja e kësaj njohurie në mjediset arsimore do të na ndihmonte të arrinim edhe ato grupe që marrin pak ose aspak edukim financiar në shtëpi”, sugjeron kreu i VIG.

VIG fokusohet në mënyrë sistematike në forcimin e ndërgjegjësimit dhe parandalimit të rrezikut tek të rinjtë. Njohuria për rrezikun si pjesë e Programit të Qëndrueshmërisë VIG është pjesë e iniciativave për qëndrueshmërinë sociale, në bashkëpunim me kompanitë e saj lokale për të ndërmarrë masa që rrisin ndërgjegjësimin për rrezikun.

Vienna Insurance Group (VIG) është një grup lider në sigurime në Europën Qëndrore dhe Lindore. Më shumë se 50 kompani sigurimi dhe fonde pensionesh në 30 shtete formojnë Grupin me tradita shekullore (vjet shënoi 200-vjetorin). Rreth 30 mijë punonjës kujdesen ditë pas dite për rreth 32 milionë klientët e VIG. Në Shqipëri, VIG operon me kompaninë SIGMA, që vitin e kaluar shënoi 25-vjetorin e themelimit.