Më 13 Tetor, në Ditën Ndërkombëtare të Reduktimit të Fatkeqësive Natyrore, Sigma VIG, në bashkëpunim me Kryqin e Kuq, zhvilloi një aktivitet ndërgjegjësues me nxënësit e shkollës “A.Z. Çajupi” në Tiranë.
Qëllimi i këtij takimi ishte të nxisë ndërgjegjësimin për krizën klimatike dhe pasojat që ajo sjell në mjedis, ekonomi dhe shoqëri.

Ndryshimet klimatike dhe ngrohja globale po ndikojnë ndjeshëm në jetën tonë të përditshme:

• 10 vitet e fundit janë regjistruar si më të nxehtat në histori.
• Niveli i deteve është rritur me mbi 20 cm që nga viti 1900.
• Çdo vit digjen mbi 4 milionë hektarë pyje në mbarë botën.

Përmes diskutimeve me të rinjtë, u theksua rëndësia e veprimeve të përditshme, si riciklimi, kursimi i energjisë dhe përdorimi i energjisë së rinovueshme (diellore, erës) dhe përdorimi i biçikletës- si masa më e thjeshtë, dhe si hapa konkretë drejt një planeti më të qëndrueshëm.

Gjatë takimit, nxënësit u njohën edhe me projektin EU Youth Green Cinema: Green Deal, një nismë arsimore që përzgjedh mbi 50 filma evropianë të shoqëruar me materiale mësimore, seminare dhe diskutime mbi ndryshimet klimatike. Projekti synon të promovojë një Europë më të qëndrueshme dhe të nxisë zakone “të gjelbra” në përputhje me strategjinë klimatike të BE-së.

Sigma VIG mbetet e përkushtuar të mbështesë kauzat që lidhen me mbrojtjen e mjedisit dhe edukimin e brezit të ri, duke kontribuar në ndërtimin e një shoqërie më të ndërgjegjshme dhe të qëndrueshme për brezat që vijnë.