Një ditë me fëmijët e Rrëshenit – Solidariteti që sjell buzëqeshje
Ekziston një lidhje e veçantë mes Austrias dhe Veriut të Shqipërisë, e ndërtuar mbi respektin dhe dëshirën për të ndihmuar. Kjo frymë miqësie u pasqyrua sërish në nismën më të fundit të Sigma Vienna Insurance Group (Sigma VIG), e cila vendosi të mbështesë një shoqatë në Rrëshen që kujdeset për fëmijët në nevojë, duke ofruar ushqim, veshmbathje dhe përkrahje në arsimim. Stafi i Sigma VIG u bashkua për të sjellë një ditë ndryshe për këta fëmijë. Çdo punonjës kontribuoi sipas mundësisë, dhe me fondet e mbledhura u organizua një udhëtim i paharrueshëm drejt Tiranës – një ditë e mbushur me lojëra, aventura dhe shumë buzëqeshje.
Megjithëse moti nuk ishte në anën tonë, fëmijët nuk humbën asnjë grimcë gëzimi. Pas një udhëtimi komod me autobus, shëtitja e planifikuar në qendër të Tiranës u zëvendësua me një ndalesë në një lokal argëtues për fëmijë, ku ata u kënaqën me videogames, aktivitete dhe lojëra për çdo moshë.
Më vonë, kur dielli doli pas shiut, i priti një tjetër surprizë: ngjitja me teleferikun e Dajti Ekspres. Peizazhi mahnitës dhe ylberi që u shfaq gjatë rrugës, e bënë këtë eksperiencë të magjishme. Në majë të Dajtit, fëmijët shijuan një drekë me pica të ngrohta, falë mikpritjes së stafit të Sigma VIG dhe Dajti Ekspres. Dita përfundoi me një vizitë në kinema, ku emocionet dhe entuziazmi i fëmijëve nuk kishin të sosur. Për shumë prej tyre, ishte hera e parë që provonin lojëra elektronike, teleferik apo kinema – përvoja që do t’u mbeten gjatë në kujtesë.
Kjo nismë është dëshmi e angazhimit të Sigma VIG në Shqipëri për të sjellë jo vetëm siguri financiare, por edhe kujdes njerëzor, dashuri dhe shpresë për komunitetet që kanë më shumë nevojë. Sepse çdo buzëqeshje e rikthyer është një investim në të ardhmen.
