Sigma VIG dhe angazhimi për përgjegjësi sociale në Social Active Day
Në fundjavën e fundit të tetorit 2023, stafi i Sigma Vienna Insurance Group mobilizohet për një ditë të veçantë dedikuar përgjegjësisë sociale dhe shërbimit ndaj komunitetit: Social Active Day. Rreth 60 kolegë të Sigma VIG iu përkushtuan plotësisht pastrimit të pikës doganore të Hanit të Hotit, një vend kyç që shërben si kartëvizitë prezantimi e Shqipërisë për turistët që hyjnë dhe dalin gjatë gjithë vitit. Për shkak të fluksit të madh turistik këtë vit, ambientet përreth doganës kishin nevojë urgjente për mirëmbajtje dhe pastrim.
Të pajisur me të gjitha mjetet dhe aksesorët e nevojshëm, stafi i Sigma VIG u angazhua për një ditë të tërë në pastrimin e zonës, duke grumbulluar një sasi të konsiderueshme mbeturinash plastike – materiale që kërkojnë deri në 450 vite për t’u dekompozuar. Ky aktivitet nuk ishte vetëm një përpjekje për të përmirësuar pamjen e zonës, por edhe një iniciativë për të ndarë ndërgjegjësimin mbi mjedisin me turistët dhe komunitetin lokal, duke promovuar respektin për natyrën e pasur të krahinës.
Përveç ndikimit pozitiv në mjedis dhe komunitet, Social Active Day shërbeu për të forcuar lidhjet mes kolegëve, duke krijuar bashkëpunim dhe kujtime të bukura. Sigma VIG beson se angazhimi në kauza sociale rrit jo vetëm performancën profesionale, por edhe ndikimin qytetar, duke reflektuar moton e ditës: “WE DID IT TOGETHER!”
Ky aktivitet konfirmon përkushtimin e Sigma VIG ndaj përgjegjësisë sociale, ruajtjes së mjedisit dhe zhvillimit të një komuniteti më të ndërgjegjshëm dhe të bashkuar.
