Projekti “Impakti i Ecjes dhe Programi Ushtrimor Otago” për të Moshuarit – Mbështetur nga Sigma VIG
Propozimi i projektit “Impakti i Ecjes dhe Programi Ushtrimor Otago në Përmirësimin e Parametrave të Ekuilibrit tek të Moshuarit”, nga dy profesore nga Universiteti i Sporteve të Tiranës, nënvizon rëndësinë e aktivitetit fizik dhe mbështet një kauzë me rëndësi të lartë sociale. Ky projekt është i pari i këtij lloji në Shqipëri dhe rajonin e Ballkanit, duke sjellë në praktikë programin Otago për grupmoshën +65 vjeç, veçanërisht për banorët e Shtëpisë së të Moshuarve në Tiranë. Grupmosha e tretë e azilit përbëhet kryesisht nga persona me pensione të ulëta, probleme të shëndetit dhe mungesë vëmendjeje nga familjarët. Programi i ushtrimeve Otago (PUO), i zhvilluar fillimisht nga Universiteti i Otagos në Zelandën e Re, është një program i personalizuar i ushtrimeve të rezistencës dhe ekuilibrit, i projektuar për të reduktuar rëniet dhe për të përmirësuar stabilitetin fizik tek të moshuarit.
Projekti mori mbështetjen e Sigma VIG, e cila kontribuoi në realizimin e tij, duke ndihmuar grupmoshën e tretë në Shqipëri. Gjatë një periudhe 12-javore, duke nisur nga Shkurti 2024, 24 të moshuar të grupmoshës +65 vjeç morën pjesë në 36 seanca ushtrimore, të përbëra nga:
- Seanca ushtrimesh Otago
- Seanca ecje në natyrë në zonën e Liqenit Artificial të Tiranës
- Seanca kërcimi ritmik, për përmirësimin e ekuilibrit dhe forcës muskulore
Qëllimi kryesor ishte përmirësimi i ekuilibrit të pjesëmarrësve me 30-40%, duke reduktuar rrezikun e rrëzimeve, një nga shkaqet kryesore të humbjes së jetës tek të moshuarit. Programi përfshinte 6 ushtrime nxehjeje, 5 ushtrime për forcimin e gjymtyrëve të poshtme, 12 ushtrime ekuilibri me rritje graduale dhe 2 ushtrime rikuperimi. Ecja dhe kërcimi ritmik integruan elementë fizikë, njohës dhe social, duke kontribuar në përmirësimin e aftësive motorike, faktorëve njohës dhe gjendjes psiko-sociale të të moshuarve. Gjatë gjithë rrugëtimit 3-mujor, Sigma VIG mbështeti realizimin e projektit duke siguruar transport, aksesorë sportivë dhe snack-e për pjesëmarrësit, duke nxitur bashkëpunimin dhe shpirtin festiv gjatë seancave.
Ky projekt demonstron qartë se asgjë nuk është e pamundur kur ka vullnet dhe dëshirë për të ndihmuar shtresat në nevojë, veçanërisht grupmoshën e tretë, e cila përballet me sfida të shumta në Shqipëri. Bashkëpunimi midis Sigma VIG dhe autorëve të projektit nënvizon rëndësinë e përgjegjësisë sociale, aktivitetit fizik për të moshuarit dhe përmirësimin e cilësisë së jetës së komunitetit.
