Sigma VIG mbështet projektin “Të Sigurtë për në Shkollë, Të Sigurtë për në Shtëpi” për edukimin dhe sigurinë rrugore të fëmijëve

Projekti “Të Sigurtë për në Shkollë, Të Sigurtë për në Shtëpi”, organizuar nga Kryqi i Kuq Shqiptar – Dega Tiranë, në bashkëpunim me Drejtorinë e Përgjithshme të Transportit Rrugor, ka në fokus edukimin e nxënësve të shkollave 9-vjeçare mbi rregullat e qarkullimit rrugor dhe parandalimin e aksidenteve. Sigma VIG, e angazhuar prej vitesh në nisma me ndikim social, u bashkua natyrshëm si mbështetëse e këtij aktiviteti të rëndësishëm. Fëmijët e moshës 10–14 vjeç u njohën me:

- Rregullat e sjelljes si këmbësor,

- Sinjalistikën rrugore,

- Teknika bazë të ndihmës së parë në rast aksidenti.

Vullnetarët e Kryqit të Kuq Tiranë dhe specialistët e DPSHTRR-së zhvilluan lojëra praktike, simulime dhe ushtrime edukative, duke e bërë procesin argëtues dhe të lehtë për t’u përvetësuar. Stafi i Sigma VIG mori pjesë aktive në shpërndarjen e broshurave informuese dhe në komunikimin e këshillave të sigurisë për fëmijët, gjatë aktiviteteve të zhvilluara pranë shkollave “Protagonistët”, “Dhora Leka” dhe në Sheshin Italia, ku ishin të pranishme edhe Forcat Zjarrfikëse dhe Policia e Shtetit. Interesi, bashkëpunimi dhe entuziazmi i nxënësve treguan se edukimi për sigurinë rrugore është një domosdoshmëri për brezat e rinj.

Sigma VIG mbetet e përkushtuar ndaj kauzave sociale, veçanërisht kur lidhen me sigurinë, edukimin dhe mirëqenien e fëmijëve, duke frymëzuar edhe stafin e saj të kontribuojë aktivisht në ndërtimin e një komuniteti më të sigurt dhe më të ndërgjegjshëm.