Në prag të Festës së Fëmijëve, stafi i kompanisë SIGMA VIG u bashkua në një nismë të veçantë për të festuar 1 Qershorin, me ata që kanë më shumë nevojë për kujdes dhe dashuri – fëmijët e shtëpisë  së foshnjës “Hannah dhe Rozafa”.

Kjo ide frymëzuese, e iniciuar nga disa kolegë, u përqafua me entuziazëm nga i gjithë ekipi. Me kontributet e tyre vullnetare, u bë i mundur organizimi i një feste të ngrohtë dhe plot ngjyra, me aktivitete të dedikuara, animatorë profesionistë dhe dhurata të shumta për fëmijët. Lodra edukative, veshje të reja, produkte higjenike, dhe një pishinë portative për ditët e nxehta të verës — të gjitha u menduan me kujdes për të sjellë gëzim dhe lehtësim në jetën e përditshme të fëmijëve. Atmosfera u bë edhe më e veçantë falë pranisë së fëmijëve të disa prej punonjësve të SIGMA VIG, të cilët u bënë pjesë aktive e festës. Ata luajtën, qeshën dhe ndanë momente të sinqerta me fëmijët e shtëpisë, duke krijuar ura të bukura empatie dhe miqësie. Ishte një ditë që nuk bëri vetëm dhurata – por shkëmbeu shumë dashuri.

Për SIGMA, pjesë e Vienna Insurance Group, përgjegjësia sociale nuk është thjesht një politikë e kompanisë – është kthyer në një mënyrë jetese. Duke fuqizuar nisma që lindin nga zemra e stafit dhe duke krijuar hapësira ku komuniteti dhe familja ndërthuren, ne ndërtojmë një kulturë të solidaritetit të vërtetë dhe ndikimi të qëndrueshëm në shoqëri. Ky aktivitet është një dëshmi se si një veprim i përbashkët, i nisur me dashuri dhe vullnet të mirë, mund të ndriçojë ditën dhe të lërë gjurmë në zemrat e të gjithëve – të vegjël dhe të rritur.